Gasteizko Irakurle Klubak ikasturte berrirako programa aurkeztu du

Gasteizko Irakurle Klubetik ikasturte berrirako programa helarazi digute. Hilero-hilero solasaldiak antolatu dituzte, euskal literaturako azken nobedadeak eta duela zenbait urte kaleratutako liburu gogoangarriak tartekatuz. Hasierako ekitaldia gainera, kontuan izateko modukoa da: bihar, urriak 11, Raymond Queneauren Estilo Ariketak liburua aurkeztuko baitute Arabako hiriburuan, Mireia Gabilondo, Patxo Telleria eta Karlos Zabalaren irakurketa dramatizatuek lagunduta eta itzulpen onenaren Euskadi Saria irabazteko izendatu berri duten Xabier Olarraren azalpen betiere argigarriekin. Donostia, Bilbo eta Iruñean egindako aurkezpenetan erdietsitako arrakasta borobila kontuan hartuta, pentsatzekoa da Olarra eta konpainia sorbalden gainean hartuta eta bibaka aterako dituztela aretotik. Programa osoa jarraian:

Urriaren 11, asteazkena
Aurkezpen-ekitaldia: Raymond Queneauren Estilo ariketak, Xabier Olarra, Mireia Gabilondo, Patxo Telleria eta Karlos Zabalaren eskutik.

Urriaren 26a, osteguna
Uxue Apaolaza, Umeek gezurrak esaten dutenetik, Erein 2005.

Azaroaren 29a, asteazkena
Paul Auster, Brooklyn-go erokeriak, Alberdania 2006.

Abenduaren 21a, osteguna
Juan Luis Zabala, Galdu arte, Susa 1996.

Urtarrilaren 25a, osteguna
Irene Nemirovsky, Dantzaldia, Txalaparta 2006.

Otsailaren 22a, osteguna
Pruden Gartzia, Lazarraga, Ernazimentua euskaraz, Pamiela 2005.

Martxoaren 29a, osteguna
Robert Walser, Jacob von Gunten, Erein 2005.

Apirilaren 26a, osteguna
Koldo Izagirre, Non dago Basques' Harbour, Susa 1997.

Maiatzaren 24a, osteguna
Truman Capote, Odol hotzean, Igela 1993.

Ekainaren 28a, osteguna
Jose Luis Otamendi, Euri kontuak, Susa 1999.