Nafarroako artista gazteen lanetaz gozatzeko aukera izanen da berriz ere sariketa honekin. Maiatzaren 11tik uztailaren 5era bitartean, aurtengo Encuentros lehiaketaren edizioan parte hartu nahi dutenek, izena emateko beta dute. Urtero urtero, sariketa hau handitzen doa eta aurten arte adierazpen ezberdinei tartea ireki nahi izan zaie. Honela, musika, arte plastikoak, literatur generoak, ikusentzunezkoen sorkuntza eta antzezpen arteak izango dira besteak beste Encuentros 2005ean.
Sariketa hau, Nafarroako artista gazteen lanen erakusleiho izateko helburuarekin jaio zen. Urteak pasa ahala, Nafarroako abangoardiazko eszenaren topaleku bihurtu da Encuentros lehiaketa. Bertan aurkezten diren lanak goranzko maila erakusten ari dira azken urteotan, Nafarroan arte mailan maila handia badagoela erakutsiz.
Maiatzaren 11tik uztailaren 5era bitartean aurkezten diren lanak, udara partean izanen dira baloratuak Encuentros 2005aren epaimahaia osatzen dutenen partetik. Iraila eta urrian eginen dira sariketaren final aurrekoak eta finalak. Behin irabazleak hautatuta, publiko zabalak, haien lanetaz gozatzeko aukera izanen du, izan ere Encuentros lehiaketan sarituak izaten direnak, zabalkunde eta promozio handia izanen dute ordainean.
Disziplina ezberdinentzat arau eta baldintza bereziak jarri dituzte antolatzaileek. Haien berri izateko www.encuentrosnavarra.com web gunea martxan jarri dute. Bertan, arestian aipatutako oinarrietaz aparte, aurreko urteko lehiaketen berri ematen dute.
No hay comentarios:
Publicar un comentario