«Gauza txikien liburua» obrak Beterriko Liburua literatur aipamena irabazi du aurten. Asteasuko Udal Arteoan saria emateko ospatu zen ekitaldian «Pako Aristik euskal idazlearen aldeko aldarria zabaldu zuen. Ni euskal idazlea naiz» hitzekin hasitako hitzaldian, euskaraz diharduten literatur sortzaileek pairatzen duten egoera salatu zuen. Gizartean euskal idazleek duten lekuari «etsigarria» iritzi zion, eta «Ikastolen aldeko festa erraldoietan 120.000 lagun biltzeko gai den herrialde honek bi edo hiru mila irakurle baino» ez edukitzea salatu zuen.
Diskurtsuan adierazi zuenez, bestelako lanak alde batera utzi zituen berak, literaturan aritzeko. Hogei urte joan dira geroztik eta penagarriak diren egoerak ikusi ditu Aristik: ?Ezagutzen nituen liburu bat atera eta, auskalo zergatik, planto egin zuten idazle bikainak. Ezagutu ditut itzaltzen joan diren bokazioak, enpresarik kutreenetan enplegatu diren idazleak?.
Gainera hedabideek eta hitzaldien antolatzaileek besteak beste idazleei ematen dieten trataera ere aipatu nahi izan zuen. ?Hogei urte hauetan behin ere ez naute eraman ETB 2ra? adierazi zuen, ?egunkarietan idazten ditugun artikuluak ez daude duintasunez ordainduak? eta ?ematen ditugun hitzaldiak, ondo antolatuak egon arren ez daude, gehienak, duintasunez ordainduak? gaineratu zuen ondoren.
Horren aurrean idazleen garrantzia azpimarratu nahi izan zuen Aristik: ?Herrialde hau sentitzeko, ulertzeko, bereganatzeko eta interpretatzeko ahalegin berezi bat egiten duen jendea da idazlea?. Idazlea kontuan hartzeko eskatu zuen azkenik, ?inork gomendatu ez zion lan bakarti eta isila egiteko bezain burugogorra izan delako?.
No hay comentarios:
Publicar un comentario