Unai Elorriagaren liburu berria kalean da dagoeneko. ?Vredaman? izena eman dio eta Bilboko Bidebarrieta liburutegian aurkeztu zuen atzo. Algortako idazleak azaldu zuenez inteligentzia eta heriotzaren arteko harremanaren inguruan dago osatua lan berria. Hirugarren eleberria du Elorriagak eta oraingoan elkarrekin harremana duten lau istorio papereratu ditu.
Tomas izeneko ume batena da liburuko istorio nagusia. Ume horren mundua ikusteko ezohiko modua ekarri du nobelara Elorriagak. Idazlearen esanetan bere aurreko eleberrietan ere antzeko zerbait egin izan du (?SPrako Tranbia?-ko Lukasen kasuan adibidez) eta oraingoan ere munduaren ikuspegi desberdinak topatuko ditu irakurleak lan honetan.
Tomasen osaba bat, lehengusu bat eta Piedad izeneko emakume zahar bat dira beste protagonistak. Horien eskutik ezagutuko ditu irakurleak bestelako istorioak ere: Munduko ebanistarik onena izandakoarena, Piedaden mutil-laguna izandako arkitekto famatuarena... Ahots asko bildu nahi izan ditu algortarrak hirugarren liburu honetan. Idazleak azaldu zuenez, istorioak linealak eta errazak dira, baina horien barruan ?ematen duena baino gehiago? ezkutatzen da.
Liburuaren izenburuari dagokionez, Faulknerren eleberri bateko Vardaman izeneko pertsonaia eta Vredeman de Brie margolariaren izenak elkartuta osatu du Elorriagak. Izen hori ez da eleberri osoan azaltzen hala ere. Aita-semeen inguruan liburuan esaten denarekin lotu behar da izenburua (Elorriagak azaldu zuenez, Vredeman de Brie-k ez zuen inoiz margo originalik egin, aitarenak kopiatu baizik).
Aurkezpenaren hasieran apur bat harrituta geratu ziren bertara inguratutako kazetariak: Elorriagarekin batera Xabier Mendiguren editorea eta Olatz Garcia ikerlaria aritu ziren. Azken honek ingeles bikainean ekin zion aurkezpenari, denen harridurarako. Izan ere, sarritan gertatzen den moduan, atzo ere bazen argibideak gaztelaniaz eskatu zuen kazetaririk eta aurkezleek europatik gertuago egon nahi izan zuten ?Vredaman? plazaratzerako orduan. Hala ere azkenean, gaztelaniaz ere mintzatu behar izan zen Elorriaga.
No hay comentarios:
Publicar un comentario